Joh 17 | KUD | STEP | Ginauli teina Yeisu bada iꞌataꞌidiꞌo ta galewa ainai itamayahi, ta iꞌawaꞌawanoi, iwalo, ‘Tamagu, yagu hauga bada ibwalenimaꞌo. Ainaena yau natum mata yam wasawasa umohegau ta yam wasawasa yaꞌabiye mahalava.

John 17

Yeisu tauyemidiwo vehabadi iꞌawanoi

1 Ginauli teina Yeisu bada iꞌataꞌidiꞌo ta galewa ainai itamayahi, ta iꞌawaꞌawanoi, iwalo, ‘Tamagu, yagu hauga bada ibwalenimaꞌo. Ainaena yau natum mata yam wasawasa umohegau ta yam wasawasa yaꞌabiye mahalava. 2 Dova owa loina umohegau tomowa maudoidi vehabadi, na ainaena yau yawahi miyamiya vateyaina tomowaowa yamohe geyoꞌawaei aidiyai. 3 Neta yawahi miyamiya vateyaina mata tomowa hihanapuigo ebeha owa ubom Yaubada moiha, yo yau Besibesinanagu hihanapuigau ebeha owa uvevetamalegaumane. 4 Baleꞌu teina ainai yam wasawasa yaꞌabiye mahalavayaꞌo, wuwuna yagu paihowao umomohegauwa bada yaveꞌovidiꞌo. 5 Tamagu ee, owa, teina hauga mehemwai uꞌabiye wasawasaegau, dova mugai owa na yau yada wasawasawa ainai tamiyamiya, na mulitai baleꞌu taꞌaꞌatububunine.

6 ‘Ta mumugam maudoina bada yaveꞌitaenaꞌo hiya taumiya baleꞌu umomohegaune aidiyai, wuwuna owa yam bodao na umomohegaune, ta yam walo maudoina himulitaedi, 7 yo hinage ginauli maudoina umomohegaune hihanapuidiꞌo ebeha owa alimwena hilalaomane. 8 Eeta walowa umomohegaune bada yaveꞌitadiꞌo ta atediyai himwaudiꞌo, ainaena hihanapu iliꞌilimanigau ebeha owa alimwena yalalaomane, yo hinage hiyemidiyegau ebeha owa uvetamalegaumane. 9 Ainaena teina hauga vehabadi yaꞌawaꞌawanoi alimwai. Nigele ebeha taumiya baleꞌu vehabadi, na hesi bodaone umomohegaune vehabadi, wuwuna hiya yam bodao. 10 Na yam bodaone yau yagu bodao dova hinage yagu bodaone owa yam bodao. Eeta yada bodaone yadi yemidi ainaena yavewasawasaꞌo. 11 Na yau hauga teina baleꞌu yalaugabaei na alimwai yalaowa, na hiya baleꞌuwai himiyamiya, vehabadi yaꞌawaꞌawanoi. Tamagu tauwahiyala yeham alaꞌalawowolina ainaena uꞌita avivinidi na yeham umomohegauwa, ainaena hiyeboda ehebo, dova owa na yau taveꞌehebone. 12 Haugana yau baidadi yam wahiyalane umohegauꞌo ainaena yaꞌiꞌita avivinidine, ta nigele teya yayagabaei, na ehebo aꞌava yababa ainaena mugai Buki Veꞌahihi ainai iwalo mahalavaꞌo ta ebe iꞌwadalele.

13 ‘Ta yau bada teina na yalalaowa alimwai, na yagu walo teina baleꞌuwai yagu bodao yawalowalowedine aidiyai ebe yagu yaliyaya ainaena hiyaliyaya mwalaꞌina. 14 Ta tomowadine yam walo bada yamohediꞌo, na hesi taumiya baleꞌu hiveꞌalehaedi, wuwuna hiya nigele taumiya baleꞌu yadi boda aidiyai hiyamiyamiya, dova hinage yau nigele yadi boda ainai yayamiyamiya. 15 Nigele yayaꞌawanoi vehabadi ta ebeha baleꞌuwena uvai mahalavaedi, na hesi yaꞌawaꞌawanoi vehabadi ta ebe havena Tomodulele iꞌabiꞌabitowoidi. 16 Ainaena teina hauga hiya nigele taumiya baleꞌu yadi boda ainai hiyamiyamiya, wuwuna hiya dova yau. 17 Yaꞌawanoi alimwai ta yam walo moihaena uꞌabiye veꞌahihiyedi ta ebe yam bodao masemaseledi. 18 Dova owa uvetamalegauma taumiya baleꞌu aidiyai yau hinage teina yavetamaledi taumiya baleꞌu aidiyai. 19 Yagu bodao vehabadi yatalamwegau alimwai ta ebe hauga ilalaoma ainai hiya hinage hitalam moiha alimwai.

20 ‘Tamagu yo, nigele ebeha hibom vehabadi yayaꞌawanoi, na hesi hiya hinage mulitai yadi walowena hiyemidiyegau vehabadi. 21 Yaꞌawanoi alimwai ta ebe maudoidi hiveꞌehebo alidai, dova owa na yau ehebo taꞌi, na ainaena taumiya baleꞌu hiyemidiyegau ebeha owa uvevetamalegaumane. 22 Mugai yam wasawasa umomohegauwa bada bodadine yamohediꞌo, ta ainaena hiveꞌeheboꞌo, dova tabom yada veꞌehebone. 23 Ta yau aidiyai yamiyamiya, owa hinage aliguwai umiyamiya, ta teina ainaena hiveꞌehebo moiha. Ta teina ainaena taumiya baleꞌu hihanapuigau ebeha owa uvetamalegauma, yo hinage hihanapuigo ebeha owa hiya uvelauwedi, dova yau uvelauwegau.

24 ‘Tamagu yo, hiya bada umohediꞌo aliguwai nuwanuwagu na baidaguwao amiyamiya. Ta tenem ainaena yagu wasawasawa umomohegauwa hiꞌita, wuwuna mulitai abo baleꞌu upaihowai owa uvelau mugaiyegau.

25 ‘Tamagu yo, owa taudumwalu, na taumiya baleꞌu nigele hiyahanapuigo, na hesi yau yahanapuigoꞌo. Na hinage teina bodaone bada hihanapuigoꞌo ebeha owa uvetamalegaumane. 26 Eeta mumugam yaveꞌitaenaꞌo aidiyai, na howola abo yaveꞌitauyoidi ta hihanapu iliꞌilimanigo, na ainaena yam velaune ateguwai imiyamiya, hiya hinage atediyai imiyamiya, na yau hinage atediyai yamiyamiya.’